Liburu ibiltaria

Liburu Ibiltaria deritzon egitasmoa ikastolen jaiek era bateratuan garatzen duten jarduera programatik abiatzen da. Ikasturte honetakoa bosgarren edizioa izango dugu eta azaroan abiatu zen Labarkako Assa Ikastolan.

Aurreko edizioetan egin den modu berean, ikastolen jaien antolatzaile diren ikastolez gain beste hainbatek hartuko dute parte. Izan ere Euskal Herri luze zabaleko 29 ikastoletako DBH 3ko ikasleak arituko dira sormena eta elkarlana oinarri dituen ekimen honetan, eta hortaz, ehunaka egile izango ditu aurten ere liburuak kontatuko digun istorioak.

Ikasturte honetan ikasleek JAIAK gaia jorratuko dute.

Liburuari amaiera Bizkaian emango zaio, 2025eko Ibilaldia jaiaren antolatzaile den Galdakaoko Eguzkibegi Ikastolan hain zuzen.