Berriak

ARTEA OINEZ 2026

Gaur, poz handiz aurkezten dugu ARTEA OINEZ, Nafarroa Oinezen baitan ekimen berezia. Proiektu honek ederki islatzen du gure urteko leloa: bidean bat gara.

Lelo horrek ez du soilik Oinezerako bidea adierazten. Komunitatea, lankidetza eta amets partekatua ere bada: euskararen, hezkuntzaren eta kulturaren aldeko konpromiso bateratua. 

Artea Oinez proiektuak zentzu berezia du. Izan ere, arteak, hezkuntzak bezala, pertsonak eraikitzen ditu: sormena pizten du, pentsamendu kritikoa sustatzen du eta mundua beste begirada batzuekin ikusteko aukera ematen digu.

Aurten, Celia Eslava eta Concha Cilveti bi artista nafarrak omenduko ditugu. Biak erreferente dira zeramikaren eta instalazioaren bidez egiten duten sorkuntza poetiko eta sentiberarengatik. Haien ibilbide artistikoari omenaldia eginez, gure ikastolen balioak gogorarazten ditugu: apaltasuna, ahalegina eta lurrarekin lotura estua.

ARTEA OINEZ erakusketak, hainbat artistaren laguntzarekin, elkargune bat proposatzen du: artea, euskara eta herria elkarren eskutik dabiltzan espazio bat.

Artea ere elkargunerako modu bat da. Eta hori da, hain zuzen ere, erakusketa honekin lortu nahi duguna: kultura, hezkuntza eta euskara herritarrekin elkarrizketan jarriko dituen gune bat.

Gure ikastoletan argi dugu gure konpromisoa: pertsona osoak, askeak eta kritikoak heztea. Baina guztiok batzen gaituen helburu komun bat ere badugu: euskara indartzea eta haren etorkizuna bermatzea.

Bide horretan, ARTEA OINEZ bezalako ekimenek gogorarazten digute euskara ez dela soilik ikasten den hizkuntza bat; kultura, sormena, komunitatea eta emozioa ere bada.

Horregatik, erakusketa honek ezin hobeto irudikatzen du Nafarroa Oinez 2026ren espiritua: elkarlana, parte-hartzea eta konpromiso kolektiboa. Artistak, ikastolak eta herritarrak elkarrekin topagune bat sortzen.

Azken finean, hori da gure leloarekin helarazi nahi dugun mezua: elkarrekin ibiltzen garenean, urrunago heltzen gara.

Bidean… bat gara.

Eskerrik asko, eta gonbidatuta zaudete ARTEA OINEZ erakusketa bisitatzera eta gurekin bide hau partekatzera.